Monday, November 07, 2005

வோல்வோ பஸ்ஸில் ஒரு பயணம்

தமிழ்நாட்டில் சாலைவசதிகளும், பஸ் வசதிகளும் முன்னேறியிருப்பதற்கு எம்.ஜி.ஆர் ஆட்சியில் அமைச்சராக இருந்த ஈரோடு முத்துசாமி அவர்கள் ஒரு மிகப்பெரிய காரணி.

அந்தக் காலத்தில் தான் தமிழகத்தின் பஸ் மற்றும் சாலை வசதிகள் பெரிய அளவில் முன்னேற்றம் காணப்பட்டது. (மற்ற அரசுகள் செய்திருந்தாலும் - முன்னோடி என முத்துசாமி மற்றும் எம்.ஜி.ஆர் அரசைத் தான் சொல்வேன் - என்னளவில்). அவரின் மூலம் ஈரோட்டில் இதற்கான பொறியியல் கல்லூரி கூட உருவாக்கப்பட்டது. ஏன் அரசு போக்குவரத்துத் தொழிலாளர்களின் வாரிசுகளுக்கு இதில் இட ஒதுக்கீடும் உண்டு என கேள்விப்பட்டுள்ளேன். தற்போது எங்கே இருக்கிறார் அந்த முத்துசாமி ?

ஆந்திரத்தையும், கர்நாடகத்தையும் (ஏன் - மற்ற வட இந்திய மாநிலங்களையும் கூட ஒப்பிட்டால் தமிழகத்தில் தான் பஸ் வசதி சிறந்தது என்பதில் ஐயமில்லை. கடந்த 5 ஆண்டுகளில் அரசு பஸ்களின் நிலைமை மிகவும் மோசம் ஆகியுள்ளது என்பது உண்மையானாலும், 24 மணிநேரமும் தனியாரோ அரசு பஸ்ஸோ - ஏதாவது ஒரு பஸ் பிடித்து தமிழகத்தின் ஒரு மூலையிலிருந்து இன்னொரு மூலைக்கு பஸ்ஸிலேயே பயணம் செய்யலாம். இந்த வசதி வேறெந்த மாநிலத்திலும் கிடையாது என நினைக்கிறேன்.

கலைஞரின் அரசில் குக்கிராமத்திற்கெல்லாம் மினி பஸ் ஏற்படுத்தியதும் ஒரு முன்னோடியான திட்டம் (அதில் பல ஊழல், இன்ன பிற புகார்கள் வந்திருந்தாலும், அதை நிறுத்தி பின் தற்போதைய அரசு மீண்டும் துவக்கியிருந்தாலும்)

தற்போது ஆந்திர மற்றும் கர்நாடக அரசு போக்குவரத்துக் கழகங்கள் மிகவும் முன்னேறியுள்ளன. தனியார் மூலம் கணினி வழி, டிக்கெட் வாங்கும் வசதிகள், வோல்வோ, ஹைடெக் பஸ்கள், நேரத்திற்கு (பெரும்பாலும்) சென்றடையும் பஸ்கள், பல ஊர்களுக்கு புது வழித்தடங்கள் என கலக்குகிறார்கள். கால் நீட்டும் வசதியும் பரவாயில்லை. ஆனால் தமிழக அரசு பஸ்கள் பழைய நிலையிலேயே இருப்பதாகத் தெரிகிறது. தினமும் அலுவலகம் வரும்/செல்லும் வழியில் பல தமிழக அரசுப் பேருந்துகளைப் பார்க்க முடிகிறது. டிவிடி/விசிடி என வைத்துள்ளார்களே ஒழிய பெரும்பாலான தூரப் பிரயாண பஸ்கள் மிகவும் பின்தங்கிய நிலையிலேயே உள்ளன. (சென்னை, பாண்டிச்சேரி, திருவண்ணாமலை, கன்னியாகுமாரி, மதுரை, திருநெல்வேலி, நாகப்பட்டிணம் செல்லும் பஸ்களை அடிக்கடி காண்பதுண்டு)

ஜெயலலிதாவின் முந்தைய ஆட்சியில் ராஜீவ்காந்தி பெயரில் புதுபுது பஸ்கள் எல்லாம் விட்டு சில மாதங்களிலேயே அவை அல்லாட ஆரம்பித்து செங்கோட்டையனுக்கும் அரசுக்கும் மிகுந்த அவப்பெயரைத் தேடித்தந்தன. தற்போது யார் இந்தத் துறை அமைச்சர் என்பது தெரியவில்லை நயினார் நாகேந்திரன் ? பி. விஸ்வநாதன் என http://www.tn.gov.in/department/transport.htm சொல்கிறது) அல்லது தமிழக போக்குவரத்துத் துறையில் என்ன முன்னேற்றங்கள் செய்துள்ளார்கள் என தெரியவில்லை. இன்னும் கணினி வழி முன்பதிவு செய்ய விண்ணப்ப படிவத்திற்கு எட்டணாவோ, காலணவோ வசூலிக்கிறார்கள் எனத் தெரிகிறது. வேறெந்த போக்குவரத்து முன்பதிவு நிலையங்களில் இந்த விண்ணப்ப படிவத்திற்கு காசு வசூலிப்பதில்லை (ரயில் படிவத்திற்கும்). படிவம் வீணடிக்கப்படக்கூடாதுதான் அதற்காக வரிசையில் நிற்கும் போது காலணா, எட்டணா தேடுவது கடினம் என்பது புரிவதில்லை போல.

http://www.setctn.com வலைத்தளத்தில் பல விபரங்கள் கொடுத்துள்ளார்கள்.

http://www.tn.gov.in/deptst/RoadAndTransport.htm இங்கு கொடுக்கப்பட்டுள்ள விபரங்களில் (2004 வரை) தற்போதைய அரசின் சிறப்பான சாதனையாக எனக்கு எதுவும் பிடிபடவில்லை. புரிந்தவர்கள்/தெரிந்தவர்கள் கூறவும் தெரிந்து கொள்ள வசதியாக இருக்கும்.

--o0o-- --o0o-- --o0o-- --o0o-- --o0o--



சென்றவார இறுதியில் முதல் முறையாக வோல்வோ பஸ்ஸில் பயணம் செய்ய வாய்ப்பு. பொதுவாக பயணங்கள் என்றாலே அலுத்துவிட்ட எனக்கு, கடந்த சில வருடங்களாக பெரும்பாலும் ரயிலில் தான் பயணம். அதனால் பஸ்ஸில் நெடுந்தூரப் பயணம் செய்து பல வருடங்கள் ஆயிற்று.

10 வருடங்களுக்கு முன்பு வரை பஸ்ஸில் பல ஆயிரம் கிலோமீட்டர்கள் பயணம் செய்துள்ளேன் அதுவும் தமிழகத்தின் குறுக்கும் நெடுக்கும் பல ஊர்களுக்கு. சாலைகளும் மிகவும் நன்றாக இருந்த காலகட்டம் (மழைக்காலங்கள் தவிர). சாதாபஸ், சூப்பர் டீலக்ஸ், மற்றும் திருச்சி, தஞ்சை பக்கத்து தனியார் பஸ்கள் என பலவித பஸ்களிலும் பயணம் செய்துள்ளேன். தமிழக பஸ்களின் ஒரே மைனஸ் - இடப் பற்றாக்குறை. காலை நீட்டுவதற்கு மிகவும் கஷ்டப்படவேண்டும்.



கடந்த 1 வருடமாக பெங்களூரில் உள்ள பல தனியார் மற்றும் அரசு போக்குவரத்து கழகங்கள் (ஆந்திரா, கர்நாடகம்) தங்களது நெடுந்தூரப் பயண பஸ்களை வோல்வோவுக்கு மாற்றிவிட்டன. நீங்கள் விரும்பினாலும், விரும்பாவிட்டாலும் சில தடங்களில் அதிக காசு கொடுத்து இந்த
மாதிரியான பேருந்துகளில் தான் செல்ல வேண்டும். சாதா பஸ்வேண்டுமானால் தமிழக அரசு பேருந்துகளில் செல்லலாம்.

ஏ.சி பஸ்ஸில் பயணம் செய்வது எமக்கு ஒவ்வாது ஏனெனில் இரவில் பயணம் செய்யும் போது அந்த குளிர்காற்று முகத்தில் அடிக்கும் மறுநாள் ஜல்ப் பிடிக்கும். இதனாலேயே கொஞ்சம் வசதி குறைவாக இருந்தாலும் சாதா பஸ்ஸில் செல்வது (அதாவது ஜன்னல் திறக்கும் வசதி இருக்கும் பஸ்கள்)

முதல் முறையாக இந்த வோல்வோ பஸ்ஸில் செல்வதற்கு யோசித்தேன். ஆனால் சென்ற இடத்திற்கு இந்த பஸ்தான் இருந்ததால், முதல் முறை வோல்வோ பஸ் பயணம். பெங்களூர் எல்லை தாண்டியவுடன் சித்தூர் வரை மிக அருமையான சாலை. பஸ்ஸில் குலுங்கலோ அலுங்கலோ இல்லை. ஆனால் மூடிய கண்ணாடிகள் (ஜன்னல் இல்லை) என்பதால் பல பெண்மணிகளுக்கு குழந்தைகளுக்கு பஸ் பிரயாணத்தால் வாந்தி வரும் பலருக்கும் இத்தகைய பஸ்கள் உகந்தது அல்ல என்பது எனது கருத்து. ஜன்னல் இருக்கும் பஸ்களில் வெளிக்காற்று (natural air) வருவதால் பெரும்பாலருக்கு வாந்தி வருவது மட்டுப்படுத்தப்படும் அல்லது வந்தாலும் பஸ்ஸை நிறுத்தச் சொல்லத் தேவலையில்லை ஜன்னலைத் திறந்து 'உவ்வெக்' என தீர்த்துக்கொள்ளலாம் (நடைமுறையைச் சொன்னேன் ஐயா..!)

வோல்வோ பஸ்ஸில் shock absorbers மிகவும் சிறப்பாக உள்ளதால் பஸ் மிதந்து செல்கிறது. சாலையும் சிறப்பாக இருந்துவிட்டால் இன்னும் கன ஜோர். ஆனால் ஏ.சி.போடுவதால் பஸ்ஸினுள் ஒருவித சப்தம் (மிதமானது தான்) கேட்டுக்கொண்டே இருப்பதால் - வாந்தி வராதவர்களுக்கும் வயிற்றைப் புரட்டும் ஓர் உணர்வு (பல ஆண்டுகளுக்கும் முந்தைய ஓர் கேள்வி பதிலில் சுஜாதா - பஸ்ஸில் வாந்தி வருவதற்கு - காதில் ஏற்படும் ஒரு வித அதிர்வுதான் காரணம் என எழுதியிருந்தார் அது உண்மை என்பது இந்த மாதிரியான சப்தம்/அதிர்வில் பயணம் செய்தவர்களுக்குப் புரியும்).

மற்றபடி பஸ்ஸின் கட்டமைப்பு (கீழ்ப்பகுதியில் நிறைய சாமான்கள் ஏற்றிக்கொள்ளலாம்), வேகம் செல்லுவதே தெரியாத ஓர் சொகுசு, விசிடி/டிவிடி உபயோகத்தில் நல்ல தரத்தில் ஒளிக்காட்சி என பஸ் பிரயாணத்தில் இன்னோர் மைல்கல் (ஆனால் 7 மணிநேரத்திற்குத் தாண்டி பயணம் செய்ய வேண்டுமென்றால் யோசிக்கவேண்டும் :-))

வோல்வோ பஸ் கட்டுமான தொழிற்சாலை (?) பெங்களூர் - சித்தூர் சாலையில் ஹொசகோடே என்ற இடத்தில் உள்ளது. பெங்களூரின் நகரப் பேருந்துகளிலும் இந்த ஆண்டின் இறுதியில் சுமார் 25 வோல்வோ பஸ்களைக் காணலாம்.

சில சுட்டிகள்
http://www.volvo.com/bus/india/en-in/home.htm
http://www.ksrtc.org/
http://apsrtc.gov.in/
http://apsrtc.gov.in/Coaches/Types-Facilities/Types-Facilities.htm

படங்கள் நன்றி: KSRTC மற்றும் APSRTC websites.


- அலெக்ஸ் பாண்டியன்
07-நவம்பர்-2005

6 comments:

தாணு said...

திரு. முத்துசாமி அவர்களின் காலம் போக்குவரத்துத் துறையில் ஒரு பொற்காலம்தான், அரசியலையும் கடந்தது. ஈரோடு மாவட்டத்தின் குக்கிராமங்களிலும் மேம்பட்ட சாலை வசதியை முகாம் சென்ற காலங்களில் பார்த்து அதிசயித்துள்ளேன். இன்னும் கொஞ்ச காலம் இருந்திருந்தால் தமிழ்நாடு முழுவதும் செய்திருப்பார்.

ராம்கி said...

//ஆந்திரத்தையும், கர்நாடகத்தையும் (ஏன் - மற்ற வட இந்திய மாநிலங்களையும் கூட ஒப்பிட்டால் தமிழகத்தில் தான் பஸ் வசதி சிறந்தது என்பதில் ஐயமில்லை.

100% correct. Pl. add Maharashtra also. This has been achieved even in early 90s....amazing!

donotspam said...

//இந்த வசதி வேறெந்த மாநிலத்திலும் கிடையாது என நினைக்கிறேன்//

நினைக்கிறேன் கிடையாது அலெக்ஸ், அப்படிதான். ஆனால் உறுத்துகிற ஒரு கிசுகிசு, கே.பி.என். தமிழக பேருந்து கழகத்திற்கு வருடா வருடம் மால் வெட்டுவதாக கேள்விபட்டேன். ஆந்தையார் தான் இதுக்கு பதில் சொல்லணும்.

"வற்றாயிருப்பு" சுந்தர் said...

//கே.பி.என். தமிழக பேருந்து கழகத்திற்கு வருடா வருடம் மால் வெட்டுவதாக கேள்விபட்டேன்//

அப்படிப் பார்த்தால் மால் வெட்டாத தனியார் பேருந்து உரிமையாளர்களே மாநிலத்தில் இருக்க முடியாது என்றுதான் சொல்லவேண்டும்.

முன்பெல்லாம் 9 மணி நேரமாகிய திருச்சி - சென்னைப் பயணத்தை 5 மணி நேரத்திற்குக் குறைத்ததில் சில நல்ல சாலைகளோடு, கேபிஎன் போன்ற நல்ல தரமான போக்குவரத்து நிறுவனங்களுக்கும் பங்குண்டு.

கேபிஎன்னின் பல பேருந்துகளில் - வோல்வோ உள்பட- பயணம் செய்திருக்கிறேன். காட்டுத்தனமாக ஓட்டாத நல்ல அனுபவமிக்க ஓட்டுனர்கள். முடிந்த அளவுக்கு நேரத்திற்குக் கொண்டு சேர்க்கிறார்கள். குறுகிய காலத்தில் நல்ல வளர்ச்சி கண்டுள்ள நிறுவனம்.

நடுவிலும் மட்டமான சுகதாரமற்றச் சிற்றுண்டி விடுதிகளில் நிறுத்தாமல் இப்போது அட்டகாசமான பெரிய சுகாதாரமான சாலையோர உணவகத்தில் நிறுத்துகிறார்கள் (இந்த விடுதிக்கு நடிகர் ராஜேஷ் உரிமையாளர் என்று நினைக்கிறேன்).

பயணக்கட்டணத்தைக் குறைத்தால் நலம். மால் வெட்டுவது நின்றால் கட்டணம் குறைக்க முடியும் என்று நினைக்கிறேன். நடக்காத காரியம்.

Alex Pandian said...

தாணு, ராம்கி, ஈஸ்வர், சுந்தர்,

கருத்துகளுக்கு நன்றி.

இவ்வளவு செய்த முத்துசாமி போன்றோரை ஏன் ஜெ. பயன்படுத்திக்கொள்ளவில்லை
என தெரியவில்லை அல்லது அவர் தான் ஒதுங்கிவிட்டாரா ? ஈரோட்டுக்காரர்கள் யாராவது தெரிந்தால் சொல்லவும்

ராம்கி: மகாராஷ்டிரம் பத்தி எனக்கு அவ்வளவு தெரியாது. ஆனால் மற்ற வட இந்திய மாநிலங்களில் படு மோசம். டெல்லி, ராஜஸ்தான், ஹரியானா, பஞ்சாப் போன்ற இடங்களில் தற்போது சாலைகள் எல்லாம் சூப்பர் என்றாலும் அரசு பஸ் வசதி மிகவும் மோசம். பீகாரும், உ.பியும், வங்காளமும், ஒரிஸ்ஸாவும் இந்தியாவிலேயே மிக மோசம்.

ஈஸ்வர்/சுந்தர்: கே.பி.என் பற்றி சமீபத்தில் விகடனில் (நாணயம் பகுதி) கட்டுரை வந்திருந்தது. படித்திருக்கலாம்.

தற்போது ஷர்மா/ஷாமா/ருக்மா என பல 'மா' கம்பெனிகள் பெங்களூரில் தனியார் தொலைதூர பஸ் பிஸினஸில் கொடிகட்டிப் பறக்கின்றனர். இங்கிருந்து கேரளா/தமிழகம்/ஆந்திரம் செல்லும் பஸ்கள் மிக அதிகம். அவர்களும் இங்கே லோக்கலில் கப்பம் கட்டுவார்கள்.

- அலெக்ஸ்

! ஸ்பார்க் கார்த்தி @ said...

அருமையான பயணம்,,
இந்த பக்கத்தையும் கொஞ்சம் பாருங்க
http://sparkkarthikovai.blogspot.com/p/own-details.html